سلێمانی.. باندێكی مەترسیدار دەستگیر كرا

سلێمانی.. باندێكی مەترسیدار دەستگیر كرا

ئاسایشی سلێمانی ڕایدەگەیەنێت باندێكی مەترسیداریان دەستگیركردووە كەكاریا رفاندن و كوشتنی هاوڵاتیان بووە.

بەڕێوەبەری ئاسایشی سلێمانی رایگەیاند ئەو باندەی كە دەستگیركراون چەندین تاوانی دزی، كوشتن و كاری بەدڕەوشتیان ئەنجام داوە و دەڵێت: "تا ئێستا باندی مەترسیداری لەو شێوەیەم نەبینیوە".

حەسەن نوری بەڕێوەبەری ئاسایشی سلێمانی لە لێدوانێكیدا بۆ رۆژنامەنووسان باسی لە بەشێك لە تاوانەكانی ئەو باندە تاوانكارییە كرد كە ئەمڕۆ یەکشەممە ٧ـی نیسانی ٢٠١٩، دەستگیركردنیان راگەیەندرا.

حەسەن نوری رایگەیاند دەستگیركراوەكان پێشینەی تاوانیان هەبووە و سەرەتا لە دزینی جانتای ژنانەوە دەستیان پێكردووە تا كار گەیشتووەتە دزینی ئۆتۆمبێل و كوشتنی خاوەنەكانیان.

ئەوەشی خستەڕوو كە ئەم باندە پەیوەندییان لەگەڵ باندەكانی دزی ناوەڕاست و باشووری عێراقدا هەبووە و ئەو ئۆتۆمبێلانەی دزیویانن بۆ ئەوانیان ناردووە و ئەوانیش ئۆتۆمبێلە دزراوەكانی خۆیانیان بۆ ئەم باندە ناردووە بۆ ساغكردنەوەیان.

ئاشكراشیكرد كە بە پێی لێكۆڵینەوە سەرەتاییەكان دەركەوتووە كە دوو كەسیان بە ناوی تاریق و مەریوان كوشتووە.

بەڕێوەبەری ئاسایشی سلێمانی راشیگەیاند تا ئێستا باندی تاوانكاری مەترسیداری لەو شێوەیەم نەبینیوە.