رێبوار تاڵەبانی، یەكگرتوو توشی سەرئێشە دەكات

رێبوار تاڵەبانی، یەكگرتوو توشی سەرئێشە دەكات

دواى رووداوەكانی ١٦ـی ئۆكتۆبەر تا ئەمرۆ سەرۆكی ئەنجومەنی پارێزگای كەركوك نەگەراتەوە شارەكەو بەهۆی لێدوانەكانیشیەوە حزبەكەی نیگەران دەكات.

،،

مەڵبەندی كەركوكی یەكگرتووش لە نامەیەكدا بۆ ئەنجومەنی سەركردایەتی حزبەكەیان ئاماژەیان بەوە كردووە نەگەڕانەوەی ڕێبوار تاڵەبانی ئیحراجی بۆ دروست كردوون.

لە چەند رۆژی رابردوودا رێبوار تاڵەبانی سەرۆكی ئەنجومەنی پارێزگای كەركوك، لە هەولێرەوە ئەوەی راگەیاندبوو پۆستی پارێزگاری هی پارتییە، بەڵام هەر زوو یەكگرتوو لە بەیانامەیەكدا لێدوانەكەی ڕێبوار تاڵەبانی رەتكردەوە و بە رای تایبەتی خۆی لەقەڵەمیدا.

هاوكات مەڵبەندی كەركوكی یەكگرتووش لە نامەیەكدا بۆ ئەنجومەنی سەركردایەتی حیزبەكەیان ئاماژەیان بەوە كردووە نەگەڕانەوەی ڕێبوار تاڵەبانی ئیحراجی بۆ دروست كردون.

،،

یەكێتی و پارتی ئەگەر بیانەوێت هەمان سیناریۆی هەڵبژاردنی سەرۆك كۆمار لە پارێزگای كەركوك دووبارە بكەنەوەو شتێكی زۆر ناشرین و عەیبەیەكی گەورەیە، چونكە دیسان نیشانەی پەرتەوازەیی كورد دەردەخات.

لێدوانەكەی ڕێبوار تاڵەبانی، كە هاوكات سەركردەیەكی دیاری یەكگرتووە، پاڵپشت بوو بە رای سەركردەكانی پارتی دیموكراتی كوردستان، كە پێیانوایە پۆستی پارێزگار مافی پارتیە، چونكە زیاد لە ١٠ ئەندامی ئەنجومەنەكەی هەیە لەكاتێكدا یەكێتی تەنها شەش ئەندامی هەیە.

ئەبوبەكر هەڵەدنی، ئەندامی سەركردایەتی یەكگرتوو ڕایگەیاند: یەكێتی و پارتی ئەگەر بیانەوێت هەمان سیناریۆی هەڵبژاردنی سەرۆك كۆمار لە پارێزگای كەركوك دووبارە بكەنەوەو شتێكی زۆر ناشرین و عەیبەیەكی گەورەیە، چونكە دیسان نیشانەی پەرتەوازەیی كورد دەردەخات.

سەبارەت بەو جەنگە ساردەی كە لەنێوان یەكێتی و پارتی لە ئارادایە لەسەر پرسی پارێزگاری كەركوك، هەڵەدنی ئەوەی ئاشكرا كرد كە ئەم بابەتە لەنێو ئەنجومەن و بەدەنگدان چارەسەر ناكرێت، بەڵكو دەبێت یەكێتی و پارتی رێكەوتنی سیاسی لەسەر ئەنجام بدەن.

لەم نێوەندەدا ئەو حزبەی كە زۆرترین ناوی دەهێنرێت دوای یەكێتی و پارتی، یەكگرتووی ئیسلامییە، چونكە ئەو حزبە ئیسلامییە خاوەنی 3 ئەندامی ئەنجومەنی پارێزگاكەیە و سەرۆكی ئەنجومەنی پارێزگاكەش هی ئەوانە.

،،

یەكێتی داوای لە یەكگرتوو كردووە كە رێبوار تاڵەبانی بگەرێنێتەوە بۆ كەركوك، گەرنا هەر لەناو یەكگرتوو كەسێكی دیكە لە جێگەی دابنێت، بۆ ئەوەی ئەنجومەنی پارێزگاكە بۆ پرسی پارێزگار كۆ ببێتەوە.

هەروەها ئەوەش زانراوە كە مەڵبەندی كەركوكی یەكگرتووی ئیسلامی لە نامەیەكدا، ئەنجومەنی جێبەجێكردنی حزبەكەیان ئاگادار كردووەتەوە كە نەگەرانەوەی سەرۆكی ئەنجومەنی پارێزگاكە بۆ كەركوك (رێبوار تاڵەبانی) ئیحراجییەكی گەورەی بۆ درووست كردوون و پێویستە ڕێبوار تاڵەبانی بگەرێتەوە.

رێبوار تاڵەبانی كەلە ئێستادا لە پارێزگای هەولێرە، ئاماژە بەوە دەكات ماڵەكەی لەلایەن حەشدی شەعبی داگیر كراوە، بۆیە تاكو ئێستا نەگەراوەتەوە بۆ كەركوك و بە هەندێ لە لێدوانەكانیشی، حزبەكەی توشی سەرئێشە كردووە و لەبەرامبەریشدا یەكێتی نیگەران كردووە كە بەدۆستێكی یەكگرتوو دانراوە لە كەركوك.

سەبارەت بەم بابەتە ئەبوبەكر هەڵەدنی ئەوەی باسكرد: كە دۆخەكە زۆر لەوە ئاڵۆزترە كە بە لێدوانێك كێشەكە چارەسەر بكرێت، بۆیە پێی وایە دەبێت یەكێتی و یەكگرتوو و پارتی رێك بكەون و ئەم پرسە چارەسەر بكەن.

،،

ئەو دەڵێت: "خودی ئەنجومەنی پارێزگاكە شەرعیەتی لەژێر پرسیاردایە، چونكە ساڵی ٢٠٠٥ هاوڵاتیانی كەركوك تەنها بۆ ماوەی ٤ ساڵ ئەندامەكانیان هەڵبژارد، و دوو جار هەڵبژاردن بۆ ئەنجومەنی پارێزگاكان كراوە، بەڵام لە كەركوك ئەنجام نەدراوە، بۆیە پرسەكە لە دەرەوەی ئەنجومەنەكە چارەسەر بكرێت باشترە".

دەشڵێت:" دانانی پارێزگارێك بە خێرایی بۆ كەركووك پێویستە، چونكە رەمزی كوردبوونی شارەكە دەسەلمێنێت، نەك لەرێگەی دوو كاندیدی جیای یەكێتی و پارتییەوە یاری بە كات بكات و كێشەش رووبەرووی ئەنجومەنەكە بكاتەوە".

،،

هەڵەدنی رای وایە: "زۆری ژمارەی كورسیەكانی پارتی لەچاو یەكێتی تەحەكوم بە شارەكەوە ناكات و دەبێت رێكەوتنی سیاسی كێشەكە چارەسەر بكات".

پرسی پارێزگاری كەركوك لەنێوان یەكێتی و پارتی لە ئێستادا كێشەیەكی جدییە و كاریگەری نەرێنی لەسەر گفتوگاكانی پێكهێنانی كابینەی نوێش داناوە.