ئێزیدیەكان یەكەمین جەژنی دوای داعش بەڕێوەدەبەن

ئێزیدیەكان یەكەمین جەژنی دوای داعش بەڕێوەدەبەن

ئەمڕۆ چوارشەممە ١٧ـی ٤ـی ٢٠١٩، جەژنی سەری ساڵی ئێزیدیەكان كە بە چوارشەمبا سور ناسراوە بەڕێوەدەچێت، چالاكوانێكی ئێزیدیەكان داوا دەكات پەرلەمانی عێراق پڕۆژەكەی سەرۆك كۆماری عێراق پەسەند بكات و جێبەجێكردنیشی بدرێتە دەست شەنگالیەكان، خەندان-یش بەشێك لە كەلتوری پێشوازیكردن لە ساڵی نوێی ئێزیدیەكان دەخاتەرو.

سەری ساڵی ئێزدییەكان، یەكێكە لە جەژن‌و بۆنە هەرە كۆنەكانی شوێنكەوتوانی ئاینی ئێزیدی

جەژنی چوارشەمباسور یان سەری ساڵی ئێزدییەكان، یەكێكە لە جەژن‌و بۆنە هەرە كۆنەكانی شوێنكەوتوانی ئاینی ئێزیدی، كە هەموو ساڵێك لە چوارشەمەیه‌كی مانگی نیسان ئەو یادە دەكرێتەوە، تیایدا ئێزیدییەكان ئاهەنگ دەگێڕن، چونكە بەگوێرەی میتۆلۆجیای ئێزیدییەكان لەو رۆژەدا فریشتە (مەلیك تاوس) هاتوەتە سەر زەوی و گەردون بە سروشت و جوانی گوڵە سورەكانی مانگی نیسانی رازاندوەتەوە.

ساڵانە هه‌زاران هاوڵاتی ئێزیدی، لە پەرستگای لالش لە قەزای شێخان كە شوێنی سەرەكی ئاینه‌كه‌یانه‌ بە چه‌ند چالاكییه‌كی جیاواز، بەشداریی دەكەن لە مەراسیمەكانی جه‌ژنی چوارشەممەی سور.

ئێزیدیەكان شەوانی سێشەممە لە مەزارگە ئاینیەكانی ئێزدیەكاندا، بەتایبەتی پەرستگای لالش، مۆم دادەگیرسێنن

ئێزیدیەكان شەوانی سێشەممە لە مەزارگە ئاینیەكانی ئێزدیەكاندا، بەتایبەتی پەرستگای لالش، مۆم دادەگیرسێنن و هێلكەی كوڵاو رەنگ دەكەن و نان بە رۆن و كونجی ئامادەدەكەن و بەسەر فەقیرو هەژاراندا دەبەشدەكرێت، وەك پێشكەشكردنی قوربانیەك و هەروەها  ٣٦٥ چرا دادەگیرسێنن وەك ئاماژەیەك بۆ ژمارەی رۆژەكانی ساڵ.

ئێزیدیەكان باوەڕیان وایە، مانگی نیسان مانگێکی پیرۆزی بەهارەو بەبوکی ساڵ دادەنرێت

ئێزیدیەكان باوەڕیان وایە، مانگی نیسان مانگێکی پیرۆزی بەهارەو بەبوکی ساڵ دادەنرێت، خواست و ئاواتەکانیان لەومانگە هەڵدەکشێن و پێیان وایە ئەو مانگە مانگی نوێ بونەوەی گوڵە سورەکان و سیمبوڵی ئاوەدانی‌و نوێبونەوەیە، مەلیك تاوس لەگەڵ خۆیدا خێرو خۆشی بۆ ئادەمیزاد هێناوەتە سەر زەوی، لەو یادەدا ماڵان گوڵی سور بەدەرگاو ماڵەکانیاندا هەڵدەواسن، ئێزیدییەکان لەو ڕۆژە سەردانی یەکتر دەکەن خۆشی و خۆشەویستی بۆ یەکتر دەردەبڕن.

بەدرێژایی مێژو ٧٤ كارەسات روبەروی ئێزیدیەكان بوەتەوە كە دواین كارەسات هێرشی چەكدارانی داعش و كۆمەڵكوژكردنیان بوو

بەپێی ئەو ئامارانەی پێشتر بڵاوكراونەتەوە، ژمارەی ئێزیدیەكان لە عێراق لە نێوان ٥٠٠ بۆ ٧٠٠ هەزار كەسدا دەبێت و زۆرینەیان دابەشبون بەسەر هەردو قەزای شێخان لە باكوری پارێزگای دهۆك و قەزای شەنگال لە شاری موسڵ، بەدرێژایی مێژو ٧٤ كارەسات روبەروی ئێزیدیەكان بوەتەوە كە دواین كارەسات هێرشی چەكدارانی داعش و كۆمەڵكوژكردنیان بوو.

لەمساڵدا ئێزیدیەكان ئارامتر یادی سەری ساڵ دەكەنەوە

لەمساڵدا ئێزیدیەكان ئارامتر یادی سەری ساڵ دەكەنەوە، چونكە رێكخراوی داعش كە كۆمەڵكوژی گەورەی بەرامبەر كچان و ژنانیان ئەنجامدا كۆتایی هاتوە، هەوڵی دروستكردنەوە و بنیاتنانەوەی ژیانێكی نوێ دەدرێت بۆ رزگاربوانی شەڕی داعش.

دێرین خدر، یەكێك لە چالاكوانانی ئێزیدییەکان رایگەیاند، "لە جەژنی چوارشەمبا سوردا هیوادارین ئەمە دواین كارەسات بێت كە بەسەر ئێزیدیەكاندا بێت و سەرجەمیان بگەڕێنەوە شوێن و زێدی خۆیان، ئەو كچانەمان كە ئازادكراون شتێكیان بۆ بكرێت بتوانن بێنەوە ناو كۆمەڵگە ئەمە گرنگترین خاڵە بەلای ئێمەوە".

هیوادارین كاربەدەستان و سەركردەكان بەڕاستی و بە جدی بیر لە شەنگالیەكان بكەنەوە

دێرین خدر وتیشی، "هیوادارین كاربەدەستان و سەركردەكان بەڕاستی و بە جدی بیر لە شەنگالیەكان بكەنەوە و كارێك بكەن بگەڕێنەوە زێدی خۆیان".

ئەو چالاكوانەی ئێزیدیەكان، پڕۆژەكەی سەرۆك كۆماری عێراقی تایبەت بە كچانی ئازادكراوی ئێزیدی بە كاری باش ناوبرد و رایگەیاند، "ئەو پرۆژەیە زۆر زۆر باش بو، تاڕادەیەك دەتوانێت ژیانی ئەو كچە ئازادكراوانە كەمێك ئاسایی بكاتەوە، چونكە وێرای ئەوەی باری دەرونیان زۆر خراپە، باری ئابوریشیان زۆر خراپە، ئەو پرۆژەیە لەروی ئابوریەوە دەتوانێت سودێكیان پێ بگەیەنێت، چونكە كاتێك دەگەڕێنەوە رەنگە بەشێك لەو ئێزیدیانە كەسوكاریان نەمابێت، یان ماون و چەند كچێكن، وەك دەشزانین باری دەرونیان خراپە و رەنگە نەشتوانن خۆیان كارێك بكەن".

پشتیوانی ئەو پڕۆژەیەی سەرۆك كۆمار دەكەین کە تایبەت بە ئێزیدیەکان پێشکەشی کردوە

ئاماژەی بەوەشکرد، "پشتیوانی ئەو پڕۆژەیەی سەرۆك كۆمار دەكەین، داتامان كۆكردوەتەوە بۆ ئەوەی بتوانین كارێك بكەین،  هاوكارێكی باشی پڕۆژەكە بین، داتای ئەو كچانەمان لایە، مەگەر ئەوانەی كە هەتاكو ئێستا بێسەروشوێنن".

دێرین خدر رونیکردەوە، "هیوادارم پەرلەمانی عێراق ئەو پرۆژەیە پەسەند بكەن، چونكە ئەوە كەمترین كارێكە كە بۆیان ئەنجام بدرێت، داواكارم كاتێك لە پەرلەمان ئەو پڕۆژەیە پەسەندكرا، جێبەجێكردنی بكەوێتە دەست كەسانێك كە خەمخۆر بن و شەنگالیەكان خۆیان بەڕێوەی بەرن و جێبەجێی بكەن".

بەهیوام هەردو پەرلەمانی كوردستان و پەرلەمانی عێراق ئەوەی پێیان دەكرێت بیكەن، چونكە تاكو ئێستا هەردولا زۆر كەمتەرخەم بون

ئەو چالاكوانەی ئێزیدیەكان وتیشی، "بەهیوام هەردو پەرلەمانی كوردستان و پەرلەمانی عێراق ئەوەی پێیان دەكرێت بیكەن، چونكە تاكو ئێستا هەردولا زۆر كەمتەرخەم بون، بەتایبەت پەرلەمانی كوردستان تا ئێستا نەمانبیستوە كە پڕۆژەیەكیان تایبەت بە ئێزیدیەكان پێشكەش كردبێت، بەداخەوە شەنگالیش كەوتوەتە سنوری مادەی ١٤٠ وەك پێویست خزمەت نەكراوە، هیوادارم شەنگال نەكرێتە قوربانی ململانێی سیاسی، بەڵكو بەهەردولا هەوڵی خزمەتكردنی بدەن".

دێرین خدر ئەوەش خسته‌ڕو، "هێشتا نازانرێت ژمارەی كچانی ئازادكراوی ئێزیدی چەند كەسن، هەندێك لەو كچانە لە دەرەوەی كەمپەكانن و لەناو ماڵان دەژین و یاخود خێمەیان هەڵداوە، زیاتر لە هەزار كچی ئازادكراوی ئێزیدی براون بۆ ئەڵمانیا و وڵاتانی دیكە".