ئەوە چییە لە بەردەم قەڵای هەولێر روودەدات؟!

ئەم بابەتە 3,362 جار خوێندراوەتەوە
متمانە:

سەرتیپ جەوهەر

ئەمە جاری یەكەم نییە لەسەنتەری شاری هەولێر پەلاماری خەڵك بدرێت و سوكایەتیان پێبكرێت، هەر جارەی بەبیانویەك و لەخەڵكێكی جیاواز، پەلاماری چالاكوان، كاندیدی پەرلەمان، گەشتیاری عەرەب، هەركەسێك لەلایەی دەسەڵاتدارانی ئەو شارەوە نەخوازراو بێت، ئەم هەڵسوكەوتە، لێكەوتەو دەرەنجامی خراپی لەسەر خەڵكی هەولێر جێهێشتووە، لەكاتێكدا پەلاماردان و سوكایەتیكردن بەخەڵك، لەهەڵسوكەوتی جوامێرانەی خەڵكی هەولێر دورەو بەهیچ شێوەیەك پەیوەندی بەوانەوە نییە.

دەكرێت لێرەدا چەند سەرنجێك بدەین، یەكەمیان؛ مێژویەكی درێژە لەهەولێر توركمان و كلدۆ ئاشوریی (مەسیحی) و كەمینەیەكی عەرەب لەهەولێر لەگەڵ كورد بەیەكەوە دەژین، هەموومان خزم و دۆست و هاوڕێی توركمان و مەسیحی و عەرەبمان هەیە، بەدرێژایی مێژوو هیچ كاتێك لێكترازان و جیاوازیی و هەستكردن بە جۆرێك لە رەگەزپەرستیی (راسیستی) قەومیی و دینیی نەبووە، رەنگە توركمان و مەسیحی و عەرەب لەهەولێر شایەتی باشتر بۆ خەڵكی هەولێر بدەن، هەمیشە خەڵكی ئەم شارە هێمن و سادە بوون، میوان دۆست و سەر راست بوون، بەڵام خەریكە هەڵسوكەوتی سیاسی لایەنێكی دیاریكراو، لێكەوتەو دەرەنجامی خراپ لەسەر هەست و هەڵسوكەوتی شارێك جێدەهێلێت كە لەبنەڕەتدا ئەو هەڵسوكەوتە پەیوەندی بەوانەوە نییە.

دووەمیان؛ زۆربەی هەرەزۆری روداوی سوكایەتیپێكردن و پەلاماردانەكان، لەبەردەم قەڵای هەولێرو نزیك چایخانەی مەچكۆبووە، ئەمەش بەڵگەی ئەوەیە كە روداوەكان لەخۆڕا نەبوون و نین، بەتایبەت ئەگەر تەماشای ڤیدیۆكان بكەیت، هەمویان ئامادەكارییان پێوەدیارە، ئەمەش بەڵگەیە كە روداوەكان زادەی هەڵسوكەوتی سیاسیین نەك كۆمەڵایەتیی.

هەر ئەوەنییە پەلاماری خەڵك بدرێت لەبەردەم قەڵای هەولێر، لەپەلاماردانی پەرلەمانی كوردستان لەئۆكتۆبەری رابردوو، بینیمان ژمارەیەكی زۆر گەنج بەدارو بەرد پەلاماری پەرلەمان و میدیاكارانیاندا، لەسەرەتای هێرشەكە هەردوو كەناڵی پارتی دەنگی ئەو خەڵكەیان دەگوێزایەوە كە گوایە ناڕازین و هاتونەتە بەردەم پەرلەمان، لەوانەی قسەیان بۆ تەلفزیۆنەكان دەكرد، بەشێوەزاری قسەكردنیانەوە دیاربوو، هیچیان خەڵكی هەولێر نەبوون، ئەمەش بەڵگەی ئەوەیە ئەوانە نەهاتبون، بەڵكو هێنرابوون! ئەو هەڵسوكەوتەی بەر قەڵا، لەبنەڕەتدا تێگەیشتنی سیاسیانەیە بۆ حوكمڕانیی و سەپاندنی هەژمون بەسەر كوردستان، ئەمانە هەموو روداوەكان نین، بەڵكو پێشتر لە رۆژنامەنوس دراوەو سوكایەتی پێكراوە، پەلاماری دامودەزگای میدیایی دراوەو سوتێنراوە، بارەگای حزب سوتێنراوە، دەرگای پەرلەمان داخراوە، وەزیری حكومەت دەركراوە..تد.

ئەو قسانەم بۆ ئەوەنییە بڵێم روداوە نەخوازراوەكان تەنها لەهەولێرو سنوری پارتی بوون، بێگومان روداوی خراپ و نەخوازراوی دیكەش لەسنورو ناوچەكانی دیكەی كوردستان بووە، بەڵام ئەوەی لەبەردەم قەڵا رودەدات، لەلایەك هیچ پەیوەندی بەخەڵكی جوامێری هەولێرەوە نییەو هەموو سەركۆنەی دەكەن، لەلایەكی دیكە، هەڵسوكەوتێكی ناشرین و بێزراوەو ئەوەی رویداوەو ئەوەی لەمەودواش لەوێ‌ رودەدات، هەمووان دەزانین كێین و بۆ وادەكرێت، باشترە نەیكەن بۆئەوەی لەوە ناشرینتر نەبن.