وەزارەتی ڕۆشنبیری: پەخشی ٤٥ كەناڵی ناوخۆیی لەهەرێم ڕادەگرێت

ئەم بابەتە 937 جار خوێندراوەتەوە
متمانە:

بەرپرسێكی باڵا لەوەزارەتی رۆشنبیری هەرێم رایدەگەیەنێت،  ئەمشەو بڕیاری راگرتنی پەخشی (٤٥) كەناڵی ناوخۆیی لەهەرێم جێبەجێدەكرێت و تا ئەو كەناڵانە مۆڵەتەكانیان نوێ نەكەنەوەو ئەو باج و رسوماتەی لەسەریانە نەیدەن، پەخشەكانیان ناكرێتەوە.

محەمەد گەردی، بەڕێوەبەری گشتی راگەیاندن و چاپ و بڵاوكردنەوە لە وەزارەتی رۆشنبیری هەرێم رایگەیاندوە، ئەو كەناڵانەی كە باج و رسوماتیان نەداوەو مۆڵەتەكانیان نوێ نەكردۆتەوە، دوای چەندین جار ئاگادراكردنەوەیان و مۆڵەتدان پێیان ئەمڕۆ كاتی دیاریكراو تەواو بوەو تائێستا نەهاتون بۆ تازەكردنەوەی مۆڵەتەكانیان بۆیە وەك وەزارەتی رۆشنبیری بڕیاریانداوە ئەمشەو پەخشی ئەو كەناڵە ناوخۆییانە رابگیرێت.

وتیشی ”هەتاكو مۆڵەتەكانیان نوێ نەكەنەوەو ئەو باج و رسوماتەی كە لەسەریانە نەیدەن پەخشی كەناڵەكانیان ناكرێتەوە.”

ئەوەشی خستۆتەڕو كە ئەو بڕیارەی وەزارەت دوای ئەوە هاتوە كە ئەو ماوەیەی درابو بە كەناڵەكان تەواو بوەو هەروەها چەند جارێك ئاگاداركراونەتەوە‌و چەند جارێكیش مۆڵەتەكەیان بۆ درێژكراوەتەوە، بەڵام زۆربەی ئەو كەناڵانە پابەندنەبون بە بڕیارەكەوە، بۆیە وەك وەزارەت ناچار بون بڕیاری راگرتنی پەخشەكانیان جێبەجێ بكەن.

وتوشیەتی”هەر ئەمڕۆ بڕیارەكەمان رادەستی ئەو كۆمپانیایه ‌كردوە كە پەخشەكەیان بۆ دەكات كە ئەمشەو پەخشەكانیان رابگیرێت.”

ئاشكراشیكردوە كە  ئەو كەناڵانە باج و رسوماتی زیاتر لە سێ ساڵ قەرزدارن، بڕی ئەو پارەیەش كە قەرزدارن بەگشتی نزیكەی (٣) ملیار دینارە.

گەردی ئاماژەی بەوەشدا، كە ئەو كەناڵانە بە تەنها كەناڵی ناوخۆیی نین، بەڵكو كەناڵی ئاسمانی و رادیۆشیان تێدایە كە تائێستا مۆڵەتەكانیان نوێ نەكردوەتەوەو باج و رسوماتیان نەداوەو قەرزدارن.

وتوشیەتی”ئێمە وەك قۆناغی یەكەم پەخشی كەناڵە ناوخۆییەكان رادەگرین دواتر لە قۆناغی دوەم دەستدەكەین بە گرتنەبەری رێوشوێن بەرامبەر كەناڵە ئاسمانی و رادیۆكانیش.”