كۆمەڵ و گۆران و هاوپەیمانی بۆ دیموكراسی و دادپەروەری راگەیەنراوێكی هاوبەشیان بلاوكردەوە

بۆ روبەڕوبونەوەی‌ قەیران و شكست و كارەساتەكانی‌ سیاسی‌ و سەربازی‌ لە كوردستان، پارێزگاری‌ لە دەستكەوتەكان، راستكردنەوەی‌ رێڕەوی‌ پرۆسەی‌ سیاسی‌، دانانی‌ رێگەچارەیەك بۆ ئاسایی‌ كردنەوەی‌ دۆخی‌ خورماتو و كەركوك و خانەقین و ناوچە جێناكۆكەكان، ئێمە وەك بزوتنەوەی‌ گۆڕان و كۆمەڵی‌ ئیسلامیی‌ و هاوپەیمانی‌ بۆ دیموكراسی‌ و دادپەروەری‌ داوا دەكەین:

١- قەوارەی‌ سیاسی‌ هەرێمی‌ كوردستان و یەكڕیزی‌ گەلی‌ كوردستان پارێزراوبێت، میللەتەكەمان ڕزگاركەین لە مەترسییەكانی‌ دووبەرەكی‌ و شەڕی‌ ناوخۆ.

٢- لەگەڵ هێز و لایەنە سیاسییەكانی‌  كوردستان   لە هەوڵەكانمان بەردەوام دەبین بۆ پێكهێنانی‌ حكومەتێكی كاتی لە رێگای پارلەمانەوە بۆ بە ئەنجام گەیاندنی‌ ئەركی‌ سەرەكی‌ لە بەڕێوەبردنی‌ مەلەفی‌ گفتوگۆی‌ هەمەلایەنە لەگەڵ حكومەتی فیدراڵی و ئامادەسازی‌ بۆ ئەنجامدانی‌ هەڵبژاردنێكی‌ پاك و بێگەرد بە چاودێری‌ رێكخراوە بیانییە تایبەتمەندەكان، تەواوكردنی ڕەشنوسی دەستور بە جۆرێك سیستەمی پارلەمانی تێدا جێگیر بكرێت وئامادە بكرێت بۆ راپرسی، دانانی بەرنامەو پلان بۆ چاكردنی  بژێوی‌ خەڵك.

٣- حكومەتی‌ عیراق مامەڵەی‌ لە ناوچە جێناكۆكەكان بەپێی‌ دەستور بێ و كار بۆ ئاسایی‌ كردنەوەی‌ بارودۆخی‌ ئەو ناوچانە بكات و ئاوارەكان بگەڕێنەوە سەر جێگای‌ خۆیان.

٤- دامەزراوەی‌ سەرۆكایەتی‌ هەرێم هەڵوەشێتەوەو دەسەڵاتەكانی‌ بەپێی‌ یاسا بدرێتە دامەزراوە پەیوەندیدارەكان.

٥- پەرلەمانی‌ كوردستان سەرچاوەی‌ بڕیار و یاسادانان بێ و هیچ دەسەڵاتێكی‌ سیاسی‌ لەسەروی‌ پەرلەمانەوە نەبێ.

هاوپەیمانی‌ بۆ دیموكراسی‌ و دادپەروەری‌    كۆمەڵی‌ ئیسلامیی‌ كوردستان         بزوتنەوەی‌ گۆڕان